Partida kazkarra izan da Oñatin igande arratsaldez jokatu den hau. Pilotalekua bete-bete egina zegoen pilotazalez, pilota giro bikaina, baina pilotarien joko mailak ez dio erentzun ikusminari. Saiatu dira pilotariak, baina ez dute beren egunik txukunena izan: Barriola izan da partida osoena egin duena, Ezkurdia eustea mugatu dela esan behar, Albisuk pilotakada bikainak huts handiekin nahastu ditu, eta Victorrek antzemango zuen ostiralean jokatutako partida. Irabazleek jokoan 3 tanto egitea aski izan dute hogeita bira iristeko. Victor eta Jon Ander Albisuren artean 19 tanto galdu dituzte, 12 Victorrek eta 7 Albisuk. Ez du argibide gehiago behar partidaren nondik norakoaz jabetzeko: irabazleek, ez pentsa beraiek ere finegi aritu direnik, nahikoa izan dute tantoari eustea eta huts gutxiago egitea.
Partida hau galduta, nahiz eta sailkapeneko laugarren postuari eusten dioten, nabarmen zaildu zaie final-aurretako ligan sartzeko bidea. Ezkurdia-Barriolak puntu bat gutxiago dute, baina gauko partida irabazita aberage hobea dute berdinketa kasua emango balitz; 22-21irabazi zuten Artola-Albisuk lehen bueltako partida. Hiru ekitaldi falta dira sailkapen liga amaitzeko eta ezin esan daiteke Artola-Albisurena oso erosoa denik:Olaizola II-Urrutikoetxea, Irribarria-Merino I, eta Irujo-Rezusta dituzte geratzen zaizkien aurkariak. Beren alde dute hiru bikote hauek sailkapenaren presiorik gabe jokatuko dutela: Olaizola II-Urrutikoetxea eta Irujo-Rezusta dagonerako sailkatuak daude, eta Irribarria-Merino I-k ez daukate inongo aukerarik. Baina zazpigarren puntua irabazi egin behar da, eta sartuak dauden dinamika ezkorra irauli behar horretarako. Onena, beren esku dutela, beren emaitzei zor zatzaizkiela.