Tolosako Beotibarren elkartu diren pilotazaleak irribarre berezia zuten partida amaitzean. Ezin azaldu barrenean sentitzen zutena. Eta guztia, Iñaki Artolari esker. Alegiarrak handia egin du. Egindako 18 tanto zenbatu dizkiogu guk, Ezkurdiak sake-buelta sotamanoz gora bota duena kontuan hartu gabe; beste batzuk 17, edo 16 eman dizkiote. Berdin dio, kontua zera da, Artolak gozatu egin duela pilotalekuan, eta horri esker, zaletuei irribarre berezi hori oparitu diela. Harmailak hutsik gelditu direnean, kantxa jendez bete da, eta guztien aurrelari alegiarrarekin argazkia atera nahi zuten. Txapelketako lehen partida besterik ez zen, baina Beotibarren bizitakoa handia izan da.
Hemezortzi tanto egitea handia bada, aurrean zuen bikotea kontuan hartuta, oraindik eta handiagoa da. Ezkurdiaren eta Barriolaren defentsa txapelketako onena da. Gaurko partida horren adibide garbia da; aurrelari gorriak 2 tanto besterik ez ditu egin, eta hala eta guztiz ere, partida irabaztear egon dira. Barriolak ez du atzean aginduko, baina ezta pilotarik galduko ere. Eta baztertu, nola baztertu, eta zenbat! Leitzarra frontoiko beste horma bat da, baina horma inteligentea: botatzen zaion guztia bueltatzen du, baina ez nolanahi eta noranahi.
Defentsa horri esker gorriak markagailuak aurretik ibili dira ia partida osoan. 17-9 jarri direnean, denak amaiturik zirudien urdinentzat. Artolak bikoteko pisua hartzea erabaki du, eta hil ala bizi pilotaren bila hasi da: lautik atzera, edo airez, guztiak balio zion. Aldeak murriztu ditu alegiarrak, baina gertu zituztenean bolea garbi bat txapapera joan zaio (15-18), eta gorriak 20ra eta gero 21era ihes egin dute (16-21). Haurrak kantxara ateratzeko prest, multzo handi batean. Artolak ez du etsi, ordea, eta hasitako lanari jarraipena eman dio. Pilotan gozatzen ari zen, eta tantoa bukatzeko bidea aurkitua zuenez, horretan jarraitu du, eta lau tanto paregabe lortu ditu jarraian. Berdinketarena Albisuk hatz puntekin jo eta juxtu-juxtu txapa gainean paratu denak eman die. Hogeita bana eta bihotzak eztarrian. Artekariak sutan ziren horretan atera du azken sakea alegiarrak. "Tanto txatxu bat" izan da azken hori, baina partida irabazteko balio izan duena. Orduan bai, orduan haurrak korrika irten dira pilotariengana. Ezkurdiak ezin zuen sinetsi gertatua, eta pentsa, Albisuri ere irribarreak alde egin dio. Partidako lehena ziurrenik. Zaletuen artean zoramenik ez da zabaldu, susto aurpegia oraindik gainean zutelako. Baina hori bai, gehienak irribarre berezi horrekin zeuden.
Iñaki Artolaren hitzak: