Axun Zalakaini «betidanik» gustatu zaio marraztea. Askok bezala, ordea, ezin izan du bere afizioa garatu erretiroa hartu arte. «Hala eta guztiz ere, boligrafoa eta papera beti izan ditut ondoan», dio Zalakainek.
Teknikaz galdetuta, koadro batzuetan igeltsoa edo egunkari zatiak erabili dituela dio. Gaiak aukeratzeko garaian, aurrean jartzen zaion guztia marrazten duela dio; «argazkietan aurkitzen dudana sarri marrazten dut». Erakusketan ez dagoen lan batez ere hitz egiten du billabonatarrak: «Gizonaren baserria ez nuen ezagutu, eta berak nolakoa zen kontatuta, marraztea lortu genuen».
Erretirodunen tabernan dagoen erakusketa berezia da; denborarekin joan eta gozatzeko horietakoa. Inaxi bertan zegoen atzo, gosaria hartu eta artearen inguruan galdezka. Ezagutza asko ez zuela esan arren, lanak ikusiak zituen, eta ziur bazuela iritziren bat ere. Egunkaria irakurriz zegoen alegiarra, eta agian, bihar bera aterako zela entzun behar izan zuen umore onez. Horrela izan bedi!