Bart indarrak neurtuta edo gabe, fin aritu dira herri kiroletan Albizturko gazteak. Herri kirol desafioa egin dute Larraulgo gazteen aurka, eta tartean izan dituzte, lan horietan aritzen diren aizkolari eta harri jasotzaileak. Besteak beste, Eneko Saralegi eta Eloy Corchero aritu dira aizkoran eta Jon Unanue Goenatxo III eta Jokin Eizmendi harri jasotzen.
Aizkora eta harri jasotzeaz gain, trontzan, ergometroan, lokotx biltzen, sagarrak kixkiaz biltzen, txingetan eta korrika aritu dira gazteak. Albizturtarrak ia proba osoan zehar izan dira aurretik, eta tarte batez larrauldarrak gerturatu bazaizkie ere, herritarrek irabazi dute. Ikustera hurbildu direnek ere herriko gazteak animatu dituzte gehienbat.
Lehiak lehia, giro ederrean pasa dute arratsaldea festetako azken egunean. Gaur amaituko dira jaiak.