Abaltzisketan hamar etxebizitza tasatu eraikiko ditu Gipuzkoako Foru Aldundiko Etorlur sozietate publikoak. Joan den urte amaieran aurkeztu zieten proiektua herritarrei, eta berriki eskaintzan izena emateko deialdia onartu du Abaltzisketako Udalak.
Etxebizitza tasatuak izaki, izena emateko zenbait baldintza bete beharko dituzte interesa dutenek, horien artean, beste etxebizitzarik ez izatea, urteko diru sarrerak zehaztutako tartearen barruan egotea eta azken urteetan Abaltzisketan erroldatuta egon izana —errolda baldintzak betetzen dituztenekin eskaintza guztia esleitzen ez bada, beste talde batzuk ere egin ahal izango dituzte eskaerak—. Interesa dutenek Abaltzisketako Udalaren web orrialdean kontsulta ditzakete xehetasunak.