Amasa-Villabonan urte asko daramatzate egur-taila ikastaroa eskaintzen. Jon Iñaki Ormazabal da irakaslea, eta, batez beste, 30 ikasle inguruk parte hartzen dute urtero. Zizurkilgo Rafa Gonzalez Gutierrez, Fernando Garrido Ruiz, Gorka Mendizabal Jauregi eta Jose Mari Otaño ikastaroan parte hartzen ari dira, eta urteotan egindako hainbat lan jarri dituzte ikusgai Plazida Otaño liburutegiko erakusketa-gelan. Urriaren 10era arte izango da zabalik.
Ikastaroan, besteak beste, geometria, bolumena eta erliebea lantzen dituzte, eta askotariko egur motak erabiltzen dituzte lanak egiteko. Egunotan, ikastaroan egindako lanen erakusketa jarri dute Plazida Otaño liburutegian: 50 artelan inguru daude ikusgai, hainbat espaziotan banatuta.
Irailaren 23an egin zuten erakusketaren inaugurazio-ekitaldia, eta herritar ugari hurbildu zen lanak ikustera.