Urria hasieran Zizurkilgo Herrigunean azoka berezia egingo da. Udalak herriko ekoizleekin batera antolatzen du ekitaldia, eta aurtengo edizioa herritarrekin elkarlanean antolatu nahi du. Horregatik, asteartean, ekainaren 30ean, bilera egingo dute udal ordezkariek eta ekoizleek herritarrekin batera Iriarte kultur etxean 19:30ean.
Herritarren babesa, inplikazioa, parte hartzea eta konpromisoa funtsezkoak dira azoka aurrera eraman ahal izateko. Horrela uste du Izarne Zelaia kultura zinegotziak: «Azokaren izaera indartzeko bertako eta tokiko kontsumoa sustatzea behar-beharrezkoa iruditzen zaigu, eta herritarrek herrian dugun produktua ezagutzea». Hain zuzen, ekoizleak jarri nahi dituzte azokaren erdigunean, euren produktuak ezagutarazteko eta egiten duten lanari balioa emateko.
Urria hasieran egingo duten azoka berezian, herriko baserritarren produktuen dastaketa egin asmo dutela aurreratu dute udal ordezkariek.