Zizurkilgo Lepasoro baserrira doan herri bidea konpondu dute. 2025eko ekainaren 13an izandako euri zaparradaren ondorioz, Lepasoro bidean kalteak sortu ziren, besteak beste, bidearen oinarriaren zati bat galdu zen; uraren indarrak bideko areka eta errepide azpiko materiala eraman zituen.
Gauzak horrela, Zizurkilgo Udalak bidea konpontzeko eta egonkortzeko neurriak hartu ditu: harri-lubeta berria sortu dute, eta, ura bideratzeko, aldiz, hormigoizko areka eta dagozkion estoldak jarri dituzte.
Lanak egiteko 57.000 euroko aurrekontua erabili dute, eta Gipuzkoako Foru Aldundiak zati batean estali du gastua, 11.125 euroko diru laguntza emanda.
Asfaltatze lanak
Bide batez, apirilaren 16an eta 17an Zizurkilgo Herrigunean eta Elbarrenan asfalto lanak egingo dituzte, eta tarteka, beraz, erreiak moztu beharko dituzte, lanak egin ahal izateko.