Aurrerako bizilagunen eskaerari erantzunez, Zizurkilgo Udalak neurriak hartu ditu eremuaren egungo egoera zein den ikusita. Lur jabeei exekuzio-agindua ezarri zaie, eraikina eraitsi zen eremuko kalteak konpon ditzaten eta dagokion segurtasun baldintzetan utz dezaten.
«Udalak ez zuen aurreikusten hainbeste denbora igaroko zuenik eremuak egoera horretan. Horregatik, eta bizilagunen kezkari erantzunez, esku hartzea beharrezkoa izan da. Ezarritako neurriaren arabera, eremua perimetro osoan behar bezala hesitu beharko da, modu egokian lotutako hesiarekin, eta espazioa txukun eta egoera onean mantendu beharko da aurrerantzean», adierazi du Maite Amenabar alkateak.
Auzoaren mantenu lanak urbanizazio plan baten barruan aurreikusten baziren ere, denbora gehiegi pasa dela eta, udalak bere gain hartuko ditu lan horiek.