Atxulondo kultur etxearen energia eraginkortasuna hobetzeko helburuarekin, eraikinaren fatxada eta estalkia berritzeko lanak hasi dituzte. Aurreikuspenen arabera, irailera arte iraungo du obrak.
Eraikinaren kanpoaldean egingo dituzte lanak energia eraginkortasuna hobetzeko: bero galerak murrizteko isolamendua hobetuko dute. Fatxada eta estalkiko elementuak berritu eta egokituko dituzte, horretarako beharrezko eraispen eta konponketa lanak eginda. Obra amaitzerakoan, eraikinak energia gutxiago kontsumituko du, eta erabiltzaileei espazio erosoagoa eta jasangarriagoa eskainiko zaie.
Obra Urbycolan enpresari esleitu diote eta 362.000 euroko aurrekontua du. Zizurkilgo Udalak Next Generationeko funtsetatik 150.000 euroko diru laguntza jaso du proiektua egiteko, Suspertze, Eraldaketa eta Erresilientzia Planaren barruan.
Jardueretan aldaketak
Lanek irauten duten bitartean kultur etxeko jarduerak «normaltasunez» mantentzeko asmoa dutela esan du udalak. Dena den, unean uneko esku-hartzeren batengatik aldaketaren bat egin behar badute aurrez jakinaraziko dutela esan dute arduradunek.
Udalak herriko azpiegiturak modernizatzeko eta jasangarritasunaren alde urratsak emateko konpromisoa hartua du. Maite Amenabar alkateak lehentasunezkoak jo ditu lan hauek: «Atxulondo herritarren topagune garrantzitsua da, eta baldintza onenetan egotea nahi dugu, bai erosotasunari dagokionez, baita jasangarritasunari dagokionez ere. Inbertsio honekin etorkizunari arduraz begiratu nahi diogu».