Blues Gaua egingo dute larunbatean Zizurkilen. Atxulondo tabernan hasiko da egitaraua, 19:00etan, El Oso y sus sabandijas taldearen emanaldiarekin; gauean, 23:00etan, Egarri tabernan ariko da The 44 Dealers taldea.
Zizurkilgo Udalak 23. aldiz antolatu du blues musikarekin lotutako jaialdia. Gipuzkoako Foru Aldundiaren laguntza jaso du etziko ekimena antolatzeko, eta herriko bi taberna ere laguntzaile dira.
Bi proposamen
Granadatik (Espainia) etorriko da lehen taldea Zizurkilera. El Oso y sus sabandijas taldeak blues klasikoaren eragina du oinarrian, baina rock, rhythm & blues eta, zenbaitetan, swing edo funk ukituak ere txertatzen ditu bere doinuetan. Antonio Travé, El Oso de Benalúa ezizenez ezaguna dena da taldeko gidaria. 19:00etan ariko dira Atxulondon.
Bigarren taldea Madrildik (Espainia) iritsiko da Blues Gauera. The 44 Dealers 2008 inguruan sortu zen, eta blues klasikoa zein rhythm & bluesa lantzen ditu. Estatuko blues eszenako talde garrantzitsuenetako bat da; nazioarteko artista askorekin lankidetzan aritu izan da, eta jaialdi ugaritan parte hartu du. Etzi, 23:00etatik aurrera, Egarri tabernan emango dute kontzertua.