Otsailaren 26an, Maiatza Saltsan hilabete kulturalaren ekintzak zein gairen inguruan antolatuko dituzten erabakitzeko eta proposamenak biltzeko elkartuko dira Atxulondo kultur etxean. Zizurkilgo Udalak aukera baliatu nahi du kulturgintzan dabiltzanen sarea indartzeko, elkarren beharrak ezagutzeko eta haien kezka eta ideiak elkarbanatzeko.
Horregatik, kulturgile, kulturazale, hezitzaile, hedabide eta kulturan interesa duen oro gonbidatu du bileran parte hartzera. «Urtarrilean, Gotzon Barandiaranen hitzaldian, euskarazko kulturgintzaren egoeraz hausnartu eta ondorioztatu genuen zeinen garrantzitsua den tokian tokiko kultur mahaiak indartzea», esan dute udal arduradunek.
Beraz, deialdi zabala egin dute hilaren 26ko bileran parte hartzeko. Atxulondo kultur etxean izango da 18:00etatik aurrera.