Pagamuñora igotzeko igogailua zaharkitua geratu dela eta, kabina berria jarriko dute datozen asteetan. Egunerokoan herritar askok erabiltzen duten igogailua denez, erabiltzaileen segurtasuna eta zerbitzuaren fidagarritasuna bermatzea da lanen helburu nagusia.
Kabina berriak segurtasun eta irisgarritasun baldintza hobeak eskainiko ditu, eta etorkizunean zerbitzu fidagarriagoa izatea ahalbidetuko du, mugikortasun urriko pertsonentzat zein eguneroko joan-etorrietan igogailua erabiltzen duten herritar guztientzat.
Lan horiek baliatuz, kabina inguratzen duen kristala eta instalazioaren barrualdea garbitzeko lanak ere egingo dituzte.
Lanak urtarrilaren 12an hasiko dituzte, eta lau asteko iraupena izatea aurreikusten dute; beraz, otsailaren erdialderako amaituta egotea espero dute. Epe horretan, igogailua erabat itxita egongo da, eta Pagamuñora igotzeko ohiko eskailerak edo aldapa erabili beharko dira.
Bestalde, udalak herriko azpiegiturak eta altzariak behar bezala erabiltzeko deia egin nahi die herritarrei, denon artean zaindu eta mantentzea guztion ardura dela gogoraraziz.