Asteburu honetan ekin diote Emakume Master Cuparen barruko Binakako Txapelketa Nagusiari. Zazpi bikote izango dira nor baino nor gehiago, horien artean Itsaso Erasun pilotari zizurkildarra.
Lehiaketa sistemari dagokionez, lehen fasean, bikote guztiek elkarren aurka jokatuko dute ligaxka eran eta dozena bat herritan izango dira norgehiagokak; eskualdeari dagokionez, Amezketan eta Asteasun izango dira partida horietako batzuk. Ligaxkako lau onenek, martxoaren 8a Agurainen jokatuko diren finalerdietarako txartela eskuratuko dute –lehenengoek laugarrenen aurka eta bigarrenek hirugarrenen kontra–. Finala martxoaren 22an izango da eta orduan banatuko dituzte txapelak.
Aurreko asteburuan Etxebarri eta Sopelan jokatu dira lehenengo partidak. Larunbatean, Etxebarrin, Aldai-Betegi bikotea gailendu zitzaion Sagardui-Mendizabal bikoteari 22-18ko emaitzarekin; bigarren partidan, berriz, Zabaleta-Bertiz eta Etxegarai-Capellan bikoteen artekoan lehenengoak irabazi zuten 22-12ko emaitzarekin.
Igandean, berriz, Sopelan beste bi partida jokatu ziren. Ordezko pilotariak aritu behar izan zuten. Lehenengoan 22-20ko emaitzarekin irabazi zuten Zabaleta-Bergarak, Sagardui-Gaminderen aurka eta bigarrengoan Aldai-Salsamendik irabazi zuten, Ibarrola-Erasunen aurka, 22-10eko emaitzarekin. Oraingoz, punturik ez du eskuratu, beraz, pilotari zizurkildarrak.