Lau harrirekin bi minutuko lana egin dute. Aimar Galarraga hasi da 200 kiloko laukizuzenarekin, hiru jasoaldi emanaz. Ondoren, Jokin Eizmendik sei jaso ditu. Azkenik, Gari Garmendia plazaratu da, eta Idiazabalgo herri kirolariak bost jasoaldi lortu ditu.
Eizmendiren abantaila, zilindroarekin amaitu da. Izan ere, Garmendiak 10 jasoaldi lortu ditu koparekin, eta Eizmendik zortzi zilindroarekin. Ondorengo ariketan, kubikoan, bederatzina lortu dituzte, eta bolarekin, Gari Garmendia 14ra iritsi da, bigarrena hamaikarekin geratu den bitartean. Aipatzekoa Aimar Galarragak azken ariketa horretan gerrian min hartu duela.
Gauzak horrela, Gari Garmendia txapeldunak 5.850 kilo jaso ditu. Jokin Eizmendik, 5.325 eta Aimar Galarragak 2.350.
Txapelketaren amaieran, Jokin Eizmendik agur esan dio Gipuzkoako Harri Handien Txapelketari. Bere azken ekitaldia izango dela iragarri du, eta bertaratu diren guztiak agurtu ditu ohi den moduan, harria sorbaldara igo eta gerrira jaitsiz, lurrean utzi gabe.