Jokin Eizmendi, Aimar Galarraga eta Gari Garmendia izango dira larunbatean Zizurkilen, Harri Handien Gipuzkoako Txapelketan. Intxaur pilotalekuan egingo da saioa, 18:00etan hasita, eta sarrera doakoa izango da. Lau harrirekin aritu beharko dute harri jasotzaileek: 200 kiloko errektangularra, 175 kiloko zilindro kopa, 150 kiloko kubikoa eta 165 kiloko bola. Harri bakoitzarekin 2 minutuko saio bana egingo dute kirolariek. Guztira kilo gehien jasotzen duenak irabaziko du txapela.
Lesio batetik atera berri da Jokin Eizmendi zarauztarra, eta txapelketa honetan parte hartzen duen azken urtea izango dela dio. Txapelketa ondo agurtu nahi du zarauztarrak, eta iaz bezala, txapela janzteko ahaleginak egingo ditu larunbatean. Iazko emaitza hobetzen saiatuko da Gari Garmendia idiazabaldarra ere. Aimar Galarraga oriotarrak ere ezustekoa ematen ahaleginduko da Intxaur pilotalekuan.