Hasi dira Zizurkilgo Elbarrenako jaiak eta txupinazoaren unean jende ugari elkartu da balkoian. Egarri tabernako kideek izan dute suziria botatzeko ohorea, eta lehenbizi egungo kideak igo dira. Makila eta melokotoiaren erreplika txiki bat oparitu dizkiete, eta ondoren, aurretik tabernan aritukoei deitu diete beraiekin egotera. Denak batera egonik, kide pare batek hartu dute hitza, eta besteak beste, Egarri ez dela taberna bat bakarrik, «herriko familien eta adiskideen topagunea izan da eta izaten jarraitzen du».
Suziria botaz hasi da festa, eta ondoren Joxe Arregi plazan txaranga doinuak entzun ahal izan dira, eta plazaren inguruetan buruhandiak ibili dira, haurren gozamenerako. Asteartera arte iraungo dute jaiek, egitarau oparo batekin.