Gaur hasi dituzte Andra Mari jaiak Zizurkilgo herrigunean. Goizean goizetik oilasko biltzea egin dute baserriz baserri eta, eguerdian, oilasko biltzaileen dantzaldia egin dute plazan; segidan atera dute, urtero bezala, eraso sexisten aurkako argazki herrikoia.
Arratsaldean Elektrotxufla elektrotxaranga aritu da plaza girotzen, eta erraldoi bat ere batu da musikaren erritmoan dantza egitera. Jaien hasierako suziria 20:00etan bota dute; aurretik, ordea, aldarrikapenez bete dute pregoia Igotz Alkorta festa batzordeko kideak eta Luix Urkola Txapel Eguneko txapeldunak. Biek ala biek gogoan izan dituzte, besteak beste, herriko bi gazte —zeinak istripua izan duten asteon eta osatzen ari diren—, Palestinan Israel gauzatzen ari den genozidioa, jaietan errespetuz jokatzeko beharra, eta urtez urte festak antolatzeko batzordeak egiten duen lana.
