Federatuentzat eta federatu gabe daudenentzat da Zizurkilgo IV. Duatloia. Apirilaren 12an arratsaldez egingo da, eta Euskadiko Txapelketa izango da jokoan esprint kategorian. Gizonezkoak 16:15ean hasiko dira eta emakumezkoak 16:30ean, Joxe Arregi plaza ondotik.
Lehenengo korrika zatia 5 kilometroko lasterketa izango da, 2,5 kilometroko ibilbideari bi itzuli emanez, aurreko edizioetan erabilitako berbera. Txirrindularitza zatia 20 kilometrokoa izango da, 10 kilometroko ibilbideari bi itzuli eginez eta betiko trazadura mantenduz, hau da, Adunara igoz eta gero Zizurkilgo Herrigunera. Antolakuntzatik azaldu dutenez, bide zatitxo batean asfaltatze lanak egin ditzakete, eta horrek desbideratze txiki bat eragin lezake, baina distantzian ez du eraginik izango. Azken korrika zatia 2,5 kilometrokoa izango da, ibilbideari itzuli bakarra emanez, helmugara iritsi aurretik azken ahalegina egiteko.