Green Capital enpresak ahoz jakinarazi dio Zizurkilgo Udalari Ezkeltzu inguruan egin asmo zuen parke eolikoaren proiektua behin betiko bertan behera uzten duela. Gaur eman du albisteak udalak sare sozialetan.
Espainiako Aire Segurtasuneko Agentziaren (AESA) irizpide teknikoak udalaren esanetan «erabakigarriak» izan dira proiektuaren geldialdia erabakitzeko; aire-segurtasun arazoak sor zitzakeela ondorioztatu zuen agentziak duela zenbait hilabete. «2024ko abenduan jakin genuen Eusko Jaurlaritzak behin-behinean itxitzat eman zuela proiektuari lotutako espedientea, AESAren erantzunik jaso ez zelako. Dena den, horrek ez zuen esan nahi proiektua betiko baztertu zenik, enpresak helegitea aurkezteko aukera baitzuen. Orain, enpresak berak erabaki du egitasmoari behin betiko uko egitea, eta hala jakinarazi dio Zizurkilgo Udalari», esan du Maite Amenabar alkateak.
Zizurkilgo Udalak «positibotzat» jo du proiektua bertan behera uztea: «Zalantza handiak sortzen baitzizkigun ingurumenari paisaiari eta ondareari eragingo lizkioken kalteengatik».