Zizurkilgo Udalak adierazpen instituzionala egin du hainbat herritan, tartean Zizurkilen, azaldu diren pintaketa arrazistak gaitzesteko. Udalbatzak aho batez hartu du erabakia.
Etorkinak ez eta Etorkinak kanpora esaten duten pintaketak agertu dira azken asteetan eta Zizurkilgo Udalaren esanetan hori idazten duenak, arrazismoa eta itxikeria erakusteaz gain, oinarrizko eskubide bat ahazten du: «Bizitza hobe baten bila gizakiok mugitzeko dugun eskubidea. Ehunka mila euskaldunek duela hamarkada gutxira arte egin zuten hori bera».
Zizurkilgo Udalak hitz eman du lanean jarraituko duela atzerritik datozenei harrera egin eta haiek herriko partaide sentiarazteko. «Zizurkil geroz eta anitzagoa da», aipatu dute adierazpen instituzionalean. Aldi berean, udalbatzak herritarrei eskatu die mota honetako mezu xenofoboak baztertu eta elkarbizitzaren alde egiteko.