Goizean oilasko biltzearekin sartu dira jai giroan zizurkildarrak, baina arratsaldean eman diote Amabirjin jaiei hasiera ofiziala. Lehenik, udal ordezkariek hartu dute hitza. Aurtengo festetan herritarren inplikazioa eskatu dute, «bai festa batzordean parte hartuz edo txoznan txandak eginez». Horrez gain, jarrera matxistarik ez dela onartuko aldarrikatu dute, «guztiek aske eta ondo igaro nahi ditugu festak, euskaratik eta euskaraz gozatuz».
Aurten Herribiziguneko kideek jaurti dute festen hasierako txupinazoa. Urte hauetan herrian mugimendua sortu dutelako, eta hainbat ekimenen bitartez herritarren artean parte hartzea eragin dutelako hartu dute suziria lehertzeko ardura.
Behin suziria lehertuta, festa nagusitu da Herrigunean. Umeentzako goxokiak bota dituzte udaletxeko balkoitik, eta Distopia elektrotxarangak azken kantuak eskeini ditu. Horren ostean, herri afaria egin dute, eta iluntzean, berriz, erromeriaz gozatzeko aukera izango dute 3ittu taldearekin.
Larunbata arte izango da zertaz gozatu Zizurkilgo Herrigunean. Ikusi hemen egitarau osoa.