Zizurkilgo Udalak 2024rako euskara ikasteko eta establezimenduetako errotuluak euskaraz jartzeko diru laguntzen oinarriak onartu ditu. Dirulaguntza horien helburua zizurkildarrei euskara ikastaroetan parte hartzera bultzatzea eta udalerriko merkataritza eta ostalaritza establezimenduetan errotuluak euskaraz jartzea bultzatzea da. Horregatik, diru laguntzak emango zaizkie euskara euskaltegi edo barnetegiren batean ikasten duten biztanleei, bai eta euskara hutsean edo euskarari lehentasuna emanda errotuluak jarri nahi dituzten establezimenduen jabeei ere.
Euskara ikasteko dirulaguntza
Zizurkilgo Udalak euskara ikastaroen doakotasuna bermatuko du B2 maila lortu arte (erabiltzaile aurreratua). Horrela, A1, A2, B1 eta B2 mailetan izena ematen dutenek matrikularen kostuaren %100eko diru laguntza jasoko dute. C1 eta C2 mailetako prestakuntzan jarraitzen dutenentzat (erabiltzaile gaitua), matrikularen kostuaren % 75eko laguntza emango da. Euskara ikasteko diru laguntzak eskatzeko lehen epea uztailaren 31n amaituko da.
Establezimenduetako errotuluak
Zizurkilgo Udalak euskara hutsean jarritako errotuluen kostuaren %50 lagunduko du diruz. Nolanahi ere, diru laguntza ez da 300 eurotik gorakoa izango errotuluko. Euskarari lehentasuna ematen dioten errotuluen kasuan, kostuaren %15eko diru laguntza emango da, gehienez 60 euro errotulu bakoitzeko. Diru laguntza eskaerak 2024ko abenduaren 15era arte aurkeztu daitezke.