Eskola Agenda 2030 programan parte hartzen ari diren Zizurkilgo PM Otañoko ikasleek esku-hartze plana aurkeztu dute Zizurkilgo Udalean. Azken bi urteetan Energia: bizitzaren motorra izeneko proiektua landu dute eta asteartean izan ziren udaletxean landutakoaren emaitzak aurkezten.
Maite Amenabar alkateak ikasleak zoriondu zituen egindako lan guztiagatik eta jakinarazi zuen udalak konpromisoa hartzen duela ekimen horiek aplikatzeko: «Ikasleek diseinatutako eta oparitutako piktogramak udal eraikinean jarriko ditugu». Beraz, zizurkildar gaztetxoen lanak herrian zehar ikusteko aukera izango da datozen egunetan.
«Udala urrats txikiak ematen ari da energiaren alorrean, eta herrian ahal bezainbeste energia aurrezteko lanean jarraituko dugu. Guztion arteko lankidetzak indarra ematen baitigu», azpimarratu du alkateak. Energia aurrezteko ahaleginen artean, auto elektrikoak kargatzeko bi aparatu jarri ditu Herrigunean udalak eta beste bi Danenako aparkaleku ondoan. Gainera, epe laburrean eraikin publikoetan jarritako eguzki plakak emaitzak ematen hastea espero dela aitortu du Amenabarrek.
Energia aurrezteko aldarria aho batez egin dute gazteek udaletxean egindako bileran eta nabarmendu dute energiaren kontsumoa arduratsua zizurkildar guztien kontua dela.