Azkenera iritsi da Zizurkilgo Herriguneko eskolari izena aldatzeko prozesua. Datorren ostegunean, maiatzaren 30ean, bost proposamenen artean bozkatzeko aukera izango dute herritarrek eskolan bertan 16:30etik 18:30era.
40 proposamen inguru jaso dituzte eta izena aldatzeko prozesua gidatu duen batzordeko kideen esanetan 30 inguru izan dira aproposak. Multzoka sailkatu eta orekatu egin dituzte batzordetik, eta irakasle eta guraso elkartearekin batera aukeraketa egin ondoren, ikasleak eurak izan dira azken bost izenak hautatu dituztenak: Epergain (eskola atzeko mendixka); Mendigain (eskola ondoan zegoen baserria, Karlistaden garaian erre zutena); Ezkeltzu (Zizurkilgo mendia); Txepetxa (txori txiki ohikoa Euskal Herrian, Otañoren bertsoetan agertzen dena); eta Inurri (txikitasunaren indarra erakusten duen izena).
Bost proposamen horien artean datorren ostegunean gustukoenaren alde bozkatu ahal izango dute eskolako komunitatea osatzen duten herritarrek.