Eguberrietako azoka berezian, 10:00etan hasita, bailarako artisauak eta janari postuak bildu dira. Eguraldiak, lehen orduan bederen, ez die gehiegi lagundu saltzaileei. «Eguraldiari erreparatuta, martxa handirik ez dugu espero», zioten saltzaileek.
Hogei bat postu kokatu dira herriko plazan. Produktuak denetarikoak. Esaterako, Eguberriei begira, mahaiak hornitzekoak baziren: kontserbak, pateak, likoreak, eztiak, eta ezin falta, gozagarriak ere, txokolatea eguberri itxuraz izan da eguneko postre proposamena.
Norberak bere burua apaintzeko produktuak ere topatu ahal izan ditu bisitariak. Adibidez, poltsak, belarritakoak, zein ilerako zintak. Norbere burua ondo egoteaz ari garela, ezin osasuna albo batera utzi, eta tankera guztietako kremak salgai zeuden -intsusa, kalendula, ultzerak sendatzekoak, desodoranteak...-.
Herriko eragileak hitzordua baliatu dute euren ekimenak ezagutzera emateko eta euren produktuak salgai jartzeko. Horren adibide, Bukalai dantza taldea. Beste adibide bat eskolako ikasleek aurkeztu dutena, DBH 4. mailako ikasleak pintxoak saltzen egon dira Saloura joateko, ikas-bidaiarako dirua eskuratuz.
Herrian bizi diren kultur ezberdinetara gerturatzeko balio izan du gaurko zitak. Arabiar pastelak probatu eta hennarekin azala margotzeko aukera egon da gaurkoan Zizurkilgo Eguberrietako azoka berezian.