Zizurkilgo Udaleko Euskara sailak Teodoro Hernandorena ipuin lehiaketaren deialdia egin du idazteko zaletasuna sustatu nahian. Andoain, Aduna, Alkiza, Asteasu, Amasa-Villabona, Anoeta, Irura, Larraul eta Zizurkilgo herritarrek parte hartu ahal izango dute, gehienez bi lan aurkeztuta. Gaia librea izango da, baina euskara da erabili beharreko hizkuntza.
Adin tarteen arabera maila ezberdinetan banatuko dute lehiaketa eta maila bakoitzeko parte hartzaileak luzera jakin bateko lanak aurkeztu beharko ditu. Bi kopia entregatu beharko dira Zizurkilgo udaletxean edo udal bulegoetan azaroaren 17a baino lehen.
Epaimahai aditu batek erabakiko du lan sarituak zeintzuk diren eta sari banaketa ekitaldia abenduaren 22an egingo dute. Adina eta mailaren arabera opari eta sari ezberdinak banatuko dira, lehenengo eta bigarrengo sailkatuen artean.
Parte hartu nahi dutenek Zizurkilgo Udalaren webgunean topatuko dituzte Teodoro Hernandorena XXII. Ipuin lehiaketako oinarriak.