Zizurkilgo EH Bilduren datozen lau urteetako programaren puntu nagusietakoa Bulandegiren hiritartze proiektuari jarraipena ematea da. Iker Urruzola alkatea, Maite Amenabar EH Bilduren alkategaia eta Bulandegiren hiritartze lanen diseinuan ardura izan duen Jon Izagirre Erlaitza bulegoko ingeniaria EH Bilduren ahaldun nagusigai Maddalen Iriarterekin izan dira. 2 miloi euro inguruko aurrekontua duen ekimen "anbiziotsua" atalka egingo da.
Zizurkilgo udalbatzak ekarpena egiteko eskatua dio Gipuzkoako Foru Aldundiari, trafikoa dentsitate handia jasaten duten bizilagunen bizi baldintzak hobetzea baita proiektuaren helburua. Egoera hori "aldundiaren utzikeriagatik" ematen dela salatu dute Zizurkilgo EH Bilduko hautetsiek.
Lanaren lehen fasea datozen asteetan amaituko da eta aurtengo aurrekontuan hurrengo faseko proiektua idazteko dirua jasota dago. Fase horretan, Bulandegi bidearen bi aldeetan espaloia jarriko da, gunea irisgarriagoa, seguruagoa eta erabilterrazagoa eginez. "Urte batzuk beharko dira proiektu osoa amaituta izateko, Zizurkilgo Udalaren bitartekoak mugatuak direlako. Errazagoa litzateke Gipuzkoako Foru Aldundiak udalbatzaren deiari entzun eta laguntzea erabakiko balu", esan dute udal ordezkariek.
Maddalen Iriarteri azalpen horiek eskaini dizkiote eta bertatik bertara ikusi du Elbarrenako erdiguneak jasaten duen trafikoa: 13.000 ibilgailu egunero, ibilgailu astunak horietako asko. Gipuzkoako Foru Aldundiak Zizurkilekin "zor handia" duela uste dute hautetsiek, "gai hau hamarkadetan bideratu gabe duelako eta saihesbidea ezinbestekoa dela herriaren etorkizunarentzat".
Zizurkilgo EH Bilduk asko eskertu dio Iriarteri gai hau bertatik bertara ikusi eta batzar nagusietara eramateko borondatea azaldu izana.