Zizurkilgo Fraisoro nekazaritza eskolako areto nagusian izan zen Gipuzkoako ahaldun nagusirako hautagaien solasaldia, Xabier Euzkitzek zuzendutakoa. EAJ-ko Eider Mendoza, EH Bilduko Maddalen Iriarte, PSE-EE-ko Jose Ignacio Asensio eta Elkarrekin Podemoseko Miren Echeveste izan ziren. Enba-k adierazi duenez, PP-ko Mikel Lezamak ez zuen parte hartu, «azken uneko ezusteagatik».
Lehen sektoreari eta landa guneei buruzko hainbat gai jorratu zituzten: abeltzaintza estentsiboa, herri mendietako kudeaketa, Enirio-Aralar Mankomunitateko problematika, basogintza, herri txikitako biziraupena eta lurralde oreka, basoko fauna eta otsoa, elikagaien merkaturatzea eta energia berriztagarriek nekazaritza lurrengan duten afekzioa.
Oreka eta elkarlana izan ziren hautagai guztien aldetik hitz erabilienak, eta une oro, lehen sektoreak larrialdi klimatikoaren aurrean jokatzen eta joka dezakeen papera berretsi zuten.
ENBAk «balorazio oso positiboa» egin du mahai-inguruaz: «Gure helburu nagusia nekazaritza alderdi politikoen agendan txertatzea zen eta oreka hitzaren aurrean, lehen sektorearen errentagarritasuna eta gure herriaren elikadura burujabetzaren aldeko politika zehatzak aldarrikatu zituzten».