Ombuaren itzala filma ari da bere bidea egiten. Auzolanean ari dira pelikula grabatu ahal izateko baliabide bila eta orain filmean aritzeko aktore eta figuranteen hautaprobak egingo dituzte. Hitzordua jarri dute Zizurkilgo udaletxean, apirilaren 1ean, goizez zein arratsaldez.
Aktoreak aukeratzeko goizean egin dute deialdia, 10:30etik 14:30era. Arratsaldean, berriz, udaletxera deitu dituzte figurante bezala aritu nahi dutenak, 16:00etatik 20:00etara. Arduradunek aipatu dutenez, Ombuaren itzala filmerako 500 figurante beharko dituzte, emakumeak, gizonak, gazte zein helduak.