Atzo ospatu zuten Txapel Egunaren 28. edizioa eta Iriarte jatetxean egin zuten afariaren ostean jantzi zioten txapela Ziotza Pilota Eskolako kideeei. Hain zuzen, Egarri tabernako Alex Inzak, aurreko txapeldunak, jantzi zien txapela omenduei. Honela, Ziotza Pilota Eskolakoak izango dira aurtengo Amabirjinetan, Herriguneko jaien hasierako txupinazoa botatzeko ohorea izango dutenak.
Festa batzordeak azaldu bezala, «Zizurkilgo herrigunean edo Zizurkil goian ez dago aisialdirako aukera handia eta horietako bat izaten ari da azken urteetan Ziotza Pilota Eskola; Herriguneko zein Elbarrenako neska-mutilen elkargune, pilotan jolasteko giro euskaldunean». Ziotza Pilota Eskolan eman zituzten lehen pilotakadak gaur egun maila ederrean ari diren hainbat pilotarik, baina hori lortzeko pilota eskolaren ardura hartzen duten guraso eta entrenatzaileen lana «ezinbestekoa» dela azpimarratu dute. «Pilota eskolak jarrai dezan hamaika herritarrek egin duten ahalegina eta uneotan egiten ari direna, herri giroari ekarpen garrantzitsua egiten diotelako. Txapelaren bidez, aurrera jarraitzeko indarra ere eman nahi diegu. Honela, aurtengo Txapel Eguna ezinbestean pilota hotsez jantzi da».