Joseba Otaegi zizurkildarrak bere azken euskal pentatloia jokatu zuen larunbatean, Azpeitian, bosgarren amaituz. «Sentsazioak onak izan ziren», esan du Otaegik. Prestakuntzaz «justu» iritsi zela gaineratu du, eta gainera, aurreko astean tripetako arazoekin egon zela: «Horrek dezente indargabetu zidan eta horren ondorioz ezin izan dut entrenatu nahi bezala. Gehiago zentratu naiz indartzen, entrenamenduak egiten baino, kanporaketatik finalera bitartean».
Finalean 100 kiloko bola jasotzearekin zuen beldur pixka bat zizurkildarrak: «Lasai jasotzera joan nintzen, eta baliogabe bat ere egin nuen, baina azken jasoaldietan izan zen. Balekotzat eman dezaket egindako lana. Giza proban ere gehiegi hustu gabe aritu nintzen, eta hortik aurrera disfrutatu egin nuen». Hirugarren parte hartzea zuen hau, eta orain arte ez bezala, «gozatu» egin zuela esan du. «Aizkoran libre sentitu nintzen, ez nuen beste urteetako presiorik eta buruz ere lasai aritu nintzen. Txingatan ondo sentitu nintzen, eta korrika ateratzerako nahiko garbi zeuden postuak, eta ahal nuen lan onena egitera joan nintzen». Jakitun bere azken pentatloia zela, ahal zen neurrian eguna bizitzen saiatu zen: «Zaleak eta giroa horretarako zegoen, eta gozatu egin nuen. Oso aho zapore onarekin geratu nintzen».
Otaegik bosgarren postua 37.52 eginez lortu zuen. Izeta IV.ak irabazi zuen, 31.36ko denbora eginez, historiako hirugarren denborarik onena. Bigarren, Julen Gabirondo, 32.43rekin; hirugarren, Xabier Zaldua, 32.58rekin; laugarren, Zelai IV.a, 35.55rekin; eta seigarren, Aritz Irazabal, 40.05ekin. Emakumezkoetan Nerea Arrutik irabazi zuen, 21.09rekin; bigarren, Zelai III.a, 23.22rekin; eta hirugarren, Lucia Orbe, 25.18rekin.
Argazkiak: MAIALEN ETXANIZ/UROLAKO KOMUNIKAZIO TALDEA