Gizonezkoen Euskal Pentatloiaren sei finalistak erabakita geratu ziren joan den larunbatean. Kanporaketa Azpeitian jokatu zen eta eskualdeko bi ordezkariak kalean geratu ziren, Joseba Otaegi (7.) eta Iñaki Errazkin (8.). Antolakuntzatik azaldu dutenez, ordea, Jokin Urretabizkaia Basozabalek uko egin dio finala jokatzeari, «ez baitago baldintza egokietan proba hori egiteko». Ondorioz, zazpigarren sailkatuari eman diote hilaren 24ko hitzorduan egoteko aukera. Hori, Joseba Otaegi da, eta beraz, zizurkildarra Azpeitiko finalean egongo da. Besteren batek kale egingo balu, Iñaki Errazkin ere bertan izango da.
Bi final
22:00etan hasiko dira bi finalak. Gizonezkoetan Xabier Zaldua, Izeta VI.a, Julen Gabirondo, Aitzol Atutxa, Zelai IV.a eta Joseba Otaegi lehiatuko dira. Euskal pentatloiaren bosgarren edizioa izango da. Emakumeek bigarrena jokatuko dute, eta lehian, Lucia Orbe, Nerea Arruti eta Karmele Gisasola ariko dira.