Bikoteka korri egitea. Horixe zen atzo arratsaldean Zizurkilgo Elbarrenan 44 bikotek egin zutena. Danena Atletismo Taldearen eskutik XIII. Kros Mistoa egin zuten. Denera bost kilometro osatu behar izan zituzten parte hartzaileek, lau itzuli eginez, eta helmugara iristen azkarrenak Maria Lasa irurarra eta Eñaut Galarraga zizurkildarra izan ziren. Haien atzetik iritsi ziren Maialen Gurrutxaga eta Oinatz Gonzalez andoaindarrak, eta hirugarren postua eskuratu zuten Naroa Uria eta Ion Intxausti azpeitiarrek.
Hiru bikoteek Mahalako produktuez osatutako saski bana eraman zuten etxera, eta irabazleek baita txapela ere. Gainerakoan, parte hartzaile guztien artean sei afari zozketatu zituzten, herriko tabernetan gastatu ahal izateko.
Festen aurretik egin ohi duten lasterketa izaten da kros mistoa, eta bihartik aurrera lehertuko da festa.