Melokotoi errugbi topaketa hartu du laugarrenez Zizurkilek. Udalak, Danena elkarteak, festa batzordeak eta Bera Bera taldeak antolatutako ekimenak errugbia eskualdean sustatzea du helburu, eta gaurkoan, lau talde elkartu dira: Iruñeko La Unica, Hernani, Bera Bera eta Ordizia. Hendaiako taldeak ere parte hartu ohi du normalean, eta gaur ere bertan egotekoak ziren, baina, azkenean ezin izan dute etorri.
Errugbi talderik ez duen eskualde bakarretakoa da Tolosaldea, eta hain justu, kirol hau ezagutarazi, eta bertako jendea animatzea du xede topaketak.
Topaketaren beste helburuetako bat lagunarteko giroa sortzea da, izan ere, goizean izan den topaketaren ostean, hirugarren denborarekin jarraitu dute Zizurkilgo Joxe Arregi plazan. Partidaren ostean bertako taldeak gonbidatuta egin ohi den jan-edanari deitu ohi zaio hirugarren denbora errugbian, eta zizurkildarrek prestaketa ederra egin dute. 90 lagun inguru elkartu dira bazkarian, eta ondoren musika eta dantza izango dute. Antolatzaileek azaldu dutenez, giro ederra sortu ohi da, bai bazkarian, bai eta bazkalostean ere.