Maria Moliner sariak Espainiako Kultura eta Kirola Ministerioak banatzen ditu urtero, 50.000 biztanle baino gutxiago dituzten herrietako liburutegien artean. Irakurketa sustatzen egindako lana aitortzen dute sariarekin eta 300 aipamen inguru banatzen dituzte. Aiztondoko Plazida Otaño liburutegiak sari horietako bat jaso du aurten, bigarrengoz. 2.777 euro jaso dituzte liburuetan gastatzeko.
Bigarren urtea da jarraian saria jasotzen dutena, Plazida, oihartzunaren plaza proiektuarekin. "Bertan azaltzen dira azken urtean egindako ekintza guztiak, liburutegian eskaintzen diren zerbitzuak eta liburutegiko lan ildoak", esan dute Arantxa Zabala eta Irene Urruzola liburuzainek. "Ekintza guzti hauetan parte hartzen duten herriko eragile eta erabiltzaileekin elkarlanean burututako proiektuak ere azaltzen dira".
Gipuzkoan Aiztondoko liburutegiarekin batera Eibarkoak ere jaso du aipamena Maria Moliner sariketaren barruan. Plazida Otaño 122. postuan sailkatu da 60 punturekin. Lehen saria eskuratu duenak 78 puntu eskuratu ditu eta azkenak 17.
"Sari hau ilusio handiz jaso dugu bide onetik goazela erakusten digulako", esan dute liburuzainek. "Egia esan indar handia ematen digu proiektu berrietan pentsatzeko". Aipatu dute hau guztia ez litzatekeela posible izango herriko eragile eta erabiltzaileen parte hartzerik gabe: "Proposatzen dizkiegun guztiei baiezkoa ematen digute eta parte hartzeko prest agertzen dira".