Herritarrak Akezkoerrotara gerturatu dira gaur, txandaka, errota bertatik bertara ezagutu ahal izateko. Hernandorena kultur elkarteko ekimenez konpondu zuten errota eta horretarako Aramako Ibares errotako Cobos-Irizar familiakoen laguntza izan zuten, izan ere Akezkoerrota 1963an utzi zituen industria lanak, eta 1980ra arte martxan jarri bazuten ere, geldirik eman ditu azken urteak. Gaurko azalpenak emateko bertan izan dira Hernandorenako Joxin Azkue eta Mikel Cobos-Irizar.
Gipuzkoako Erroten Eguna
Bihar da Gipuzkoako Erroten Eguna eta hori dela eta, hainbat ekitaldi izango dira bihar eskualdean. Altzon San Salvador-Bekoa errota bisitatzeko aukera izango da 12:00etatik aurrera, Asteasun 11:00etan plazatik abiatuta Urniategi errotara bisita egingo dute, Larraulen 10:30ean elkartuko dira plazan Txuringain errotara oinez joateko eta Tolosan Rafa Gorrotxategi txokolate museoa bisitatu ahal izango da 11:00etan.