Azken asteotan lanketa berezia egin dute Zizurkilen txakurren gaiaren inguruan. "Elkarbizitza da helburu nagusia eta horretarako, txakur jabeek gogoan izan behar dituzte oinarrizko hainbat betebehar", esan dute udaletik. Batetik, derrigorrezkoa izango da txakurren gorotzak jasotzea eta dagokion ontzian botatzea. Eta bestetik, elkarbizitzaren alde eta segurtasun arazorik izan ez dadin, txakurrak lotuta eraman behar direla jakinarazi du udalak.
Betebehar horiek gogorarazteko, seinale berriak jarri dituzte herrian barrena. Erdigunean, Ernio bidean, Ugaren, Azken Portun, Muñoan edota Pagamuñon jarri dituzte seinaleak.
"Elkarbizitza zaintzea guztion ardura da", esan dute udal arduradunek.