Kulturaren aldeko apustua egin eta urte berriari begira kultur programazioa prestatu du Zizurkilgo Udalak. Batetik, Gaztezulokoekin, Gabonetako oporretarako ekintzak prestatu dituzte, eta bestetik, urtarrilaren 4tik hasita, apirilera bitarte, herritar guztiei begirako egitarau antolatu dute. Musika, antzerkia, bertsoa, zirkua, denetarik izango da.
Umorearen bueltan antolatu dituzte saio gehienak, antolatzaileek uste dutelako "egoerak merezi duela beste betaurreko batzuekin begiratzea, momentu batuetarako bada ere".
Herritarrengan pentsatuta osatu dute programazioa, baina bigarren helburu bat ere baduela esan dute Ainhoa Larrea kultur teknikariak eta Maite Amenabar kultur zinegotziak: "Besteak beste, gure inguruko sortzaileak babestea. Pandemiak zaildu egin die euren lana plazaratzeko bidea, eta Zizurkilen egoera hori arintzeko asmoz, saiakera bat egin nahi dugu". Izan ere, esan dute pandemia garaian "inoiz baino argiago" geratu dela "garrantzitsua dela elkarri babesa ematea eta kultura zaintzea, kultura segurua delako".
Gabonetako oporretara begira, Gazteluzoren bidez, gaztetxoentzat ere aisialdirako ekintzak antolatu dituzte. DBHko ikasleentzat, beraiek antolatutako ping-pong txapelketa izango dute, abenduaren 29an. Eta bi irteera ere antolatu dituzte: Gasteizko Gorbeia parkera joango dira, salting parkera, abenduaren 30ean, eta abenduaren 5ean Txuri Urdin izotz jauregira egingo dute irteera.
Horrez gain, LH 4, 5 eta 6. mailetako ikasleentzat Iruñeko Rocopolisera irteera prestatu dute, eskalatzen ibiltzeko, abenduaren 28rako. Urtarrilaren 4an, berriz, serigrafia tailerra izango da, kamisetak egiteko tailerra, Janire San Sebastian herritarrak emango duena, eta urtarrilaren 7an xaboi tailerra izango dute.
Gaztezuloko ekintzetan parte hartzeko izena eman beharko da Gaztezulon bertan edo, bestela, udal bulegoetan. Eta gainerako programaziorako ere gonbidapenak eskatu beharko dira udaletxean.
Kultur egitaraua
Urtarrilak 4 |
'Bidaibizitzen' zirku ikuskizuna |
17:00 |
Atxulondo kultur etxean |
Urtarrilak 8 |
Iker Laurobaren kontzertua |
22:00 |
Joxe Arregi plazako estalpean |
Urtarrilak 14 |
Garbiñe Larrearen 'Sendabelarrek dakitena' liburuaren aurkezpena |
19:00 |
Iriarte kultur etxean |
Urtarrilak 21 |
Jakoba Errekondoren egutegiaren aurkezpena |
19:00 |
Iriarte kultur etxean |
Otsailak 6 |
'Kutsidazu bidea, Ixabel' musikala |
|
Intxaur frontoian |
Otsailak 19 |
ERRE bertso ikuskizuna |
|
|
Martxoak 6 |
'Luze edo motz', Mirari Martiarena eta Idoia Torregarai umoregileen eskutik |
|
|
Martxoak 26 |
'Gu primer!' amtzerkia, Xentimorik gabe taldearen eskutik. Inazio Tolosa, Ramon Agirre eta Nerea Gorriti aktoreekin. |
|
|
Apirilak 2 |
Zizurkilgo Blues Gaua |
|
|