Aizkolari onenen final nagusian lehiatzeko txartela lortu zuen Jon Irazu zizurkildarrak, eta, beraz, igande honetan Sherpa.ai Aizkolari Txapelketa Nagusiaren finalean izango da, 12:00etatik aurrera, Bilbao Arenan. «Ez nuen espero sailkatzea», esan du Irazuk. «Inoiz baino gutxiago entrenatuta nengoen eta ez da urte ona izan niretzat. Baina fresko hasi nintzen kanporaketan, eta azkenean finalerako sailkatzea lortu nuen».
Bere buruari finalean egotea ez ziola exijitu eta hori izan zela azkenean txartela lortzeko gakoetako bat azaldu du zizurkildarrak: «Presiorik gabe joan nintzen, eta horrek plus bat eman zidan. Orain finalean lanak bikoitzak dira eta horrek sufrimendu bikoitza suposatzen du». Finalaren garrantzia nabarmendu du Irazuk: «Urteko hitzordu garrantzitsuena izaten da aizkolarientzako eta ilusio handiarekin joango naiz, nahiz eta asko sufrituko dudan eta ez dakidan zer maila emango dudan».
Prestaketarena ere mundu bat dela gaineratu du: «Urte guztian prestatzen aritu zaitezke eta gero gertatu daiteke eguna iristerakoan gauzak nahi bezala ez ateratzea. Eta, bestalde, presiorik gabe joan, gutxiago prestatuta eta freskoago, eta gorputzak erantzutea». Bestalde, kanporaketako erreferentziek finalerako ez dutela balioko esan du Irazuk: «Lana bikoitza da eta denak elkarren aurka ariko gara».
Sherpa.ai Aizkolari Txapelketa Nagusiaren finala jokatuko da igande honetan, 12:00etan hasita, Bilbao Arenan.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!