Txikienen poz erraldoia

Tolosaldeko Ataria 2021ko ira. 25a, 12:42

Zizurkilen erraldoi eta buruhandiak atera dituzte kalera urte eta erdi luzeko etenaren ostean. Joxe Arregi plazan eman dute goiza Maurizio, Bernarda, Joakina Galartza eta Pedro Mari Otaño erraldoiek eta sorgina, deabrua, txepetxa, melokotoia eta Atxulondoko azken matxinoa buruhandiek.

Herriko haurrek Zizurkilgo erraldoi eta buruhandien izenak eta itxura ez ahanzteko, kalera atera dituzte gaur goizean. Joxe Arregi plazan egon dira eta haiekin argazkiak atera ahal izan dituzte gaztetxoek. Ikasturte hasieran Zizurkilgo hiru ikastetxeetan zabaldu zuen konpartsak gaurko hitzordurako gonbita eta norberak egindako buruhandiarekin gerturatzeko gonbidapena ere luzatu zitzaien umeei.

Meloren asteburu kulturala igaro ondoren erabaki du konpartsak kalera ateratzea eta Iker Urruzola herriko alkate eta konpartsa kideak aipatu duenez, jendeak badu gogoa berriro ere erraldoiak eta buruhandiak mugimenduan ikusteko: "Gogo itzela daukagu. Denok daukagu egoera normalean bizitzeko beharra. Erraldoiak jaiaren erdigune izaten dira eta haur, gaztetxo eta guk geuk ere badugu barrenak askatzeko beharra, buruhandi eta erraldoiekin dantza eta jolas egiteko nahia".

Eguerdira arte egon dira erraldoi eta buruhandiak Joxe Arregi plazan.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!