Elola, Alberdi, Landa eta Amianok egin dute Intxaur txapelketan aurrera

Tolosaldeko Ataria 2021ko uzt. 19a, 19:59

Jokatu dituzte Zizurkilgo Lau eta Erdiko Intxaur Txapelketako lehen bi jardunaldiak, eta finalaurrekoetara sailkatu dira lau pilotariak; beste lau partida jokatuko dituzte aste honetan.

Lau eta erdiko Intxaur Txapelketa sortu dute Zizurkilen, eta ostiralean jokatu zituzten lehen bi partidak, eta beste bi partidak igandean izan ziren.  Lehen partida irabazita Elola, Alberdi, Landa eta Amianok finalaurrekoetara sailkatzea lortu dute. 

Sortu berri den txapelketako lehen partida promesen mailakoa izan zen, eta Beñat Senarren ordez Unai Alberdi aritu zen. Alberdik lortu zuen garaipena Javi Oskozen aurka. 22-11 gailendu zen Alberdi, frontoian gauzak ondo eginda. Honela finalaurrekoetarako sailkatu da. Bigarren partidan, elite mailan, Iñaki Elola gehiago izan zen Xabi Urbieta baino. 15 tantotan utzi zuen asteasuarra Elolak. Abiadura sartu zion pilotari, eta markagailuan tartea ateratzea lortu zuen. Nahiz eta Urbietak gerturatzea lortu ezin izan zuen ezer egin.

Igandeko jardunaldian lehen partida Promesen mailakoa izan zen, eta Iker Amianok irabazi zion 22-21 Josu Igoari. Elkarren arteko lehia parekatua izan zen markagailuak erakusten duen moduan. Erritmo bizian jokatu zuten, eta ia hutsik egin gabe aritu ziren, baina gipuzkoarrak poltsikoratu zuen garaipena. Nahiz eta 21-20 Igoa aurretik joan, Aurrera Tolosakoak lortu zuen partidako azken bi tantoak bereganatzea. Honenbestez, finalaurrekoetarako sailkatuta, hilaren 31n Unai Alberdiren aurka neurtuko ditu indarrak. Elite mailako bigarren partida ez zen gutxiagorako izan. David Landak 22-20 irabazi zion Alberto Ongayri. Berdintasuna izan zen nagusi partida osoan zehar. Ondo mugitu zuten pilota, eta tanto asko egin zituzten. Honela, Landak, hilaren 31n, Iñaki Elolaren aurka jokatu beharko du finalaurrekoa.

Uztailak 24, larunbata: 20:00
Elite maila. Paul Ojuel (Hernani) / Julen Alberdi (Aurrera Tolosa).
Promesa maila. Aingeru De la Fuente (Buruzgain) / Sergio Gutierrez (San Cosme).

Uztailak 25, igandea: 12:00
Elite maila. Xabi Sancho (Pagazpe) / Eneko Labaka (Aurrera Tolosa).
Promesa maila. Julio Fernandez (San Cosme) / Aitor Altuna (Aurrera Tolosa).

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!