Horrez gain, mugikortasun jasangarria sustatzen duten esperientziak eta praktika onak ezagutarazten ditu, plazan jarritako zortzi panelen bidez. Azaroaren 2an jarri zuten erakusketa eta igandera arte, azaroaren 8ra arte, egongo da ikusgai.
Herritarrengan kontzientzia piztea da Tolosaldea Garatzenek antolatutako erakusketa honen helburu nagusia, baita eredu berriak barneratzen laguntzea ere. Pertsonak bizitzaren, ekonomiaren eta gure kaleen erdigunean jarriko dituen mugikortasunaren garrantzia azpimarratzea da, finean, ekimenaren asmoa.
Erakusketa ibiltaria da orain Zizurkilen jarrita dagoena. Tolosan, Baliarrainen eta Ibarran egon da ikusgai eta Zizurkilen geldialdia egin ondoren, Altzon jarriko dute, azaroaren 15era arte.