Zizurkilgo Aurrera plazako lehen zenbakiko agerraldia bi etxebizitzatara mugatzen dela argitu du Zizurkilgo Udalak. "Hala ondorioztatu dute osasun arduradunek gainontzeko etxebizitzetako bizilagun guztiei egindako probek negatibo eman ostean". Atzo, bi eraikinetako 60 bizilagun konfinatu zituzten, eta, beraz, bizilagun horiek euren ohiko bizitzarekin jarraitzeko modua izango dute guztiek negatibo eman eta gero.
Koronabirusean positiboa eman duten bi etxebizitzatan soilik jarraitu beharko dute konfinatuta. Eta gaineratu dute, udal zerbitzuek konfinatuta geratzen diren bizilagunekin "etengabeko harremana" mantentzen jarraituko dutela.
Udalak, beste behin, bizilagunen jarrera eskertu eta txalotu du. Baina, lasaitasun mezua berretsiz, herritarrei segurtasun neurriak hartzen jarraitu behar dutela gogorarazi die.