Zizurkilgo Udalak esku artean duen informazioaren berri eman du gaur ohar baten bitartez. Langile batek positibo eman ondoren, joan den ostiraletik itxita dago Joxe Arregi plazan kokatuta dagoen Atxulondo jatetxea. Gainerako langileei egindako probak negatibo eman dute, baina badaezpada jatetxeak itxita jarraituko du. Udalak jakinarazi duenez datozen egunetan berriz egingo zaizkie probak jatetxeko langileei.
Lasaitasunez eta arduraz jokatzeko deia zabaldu nahi izan du Zizurkilgo Udalak eta herritar guztiei segurtasun distantziak mantendu arren maskara erabiltzea derrigorrezkoa dela gogorarazi die. Eskuak garbi mantentzea ere behar beharrezkoa dela ohartarazi du.
Osasun sailarekin harremanetan dago udala eta informazioa jaso ahala herritarren artean zabalduko dutela esan du Iker Urruzola alkateak: "Elkar zaindu gaitezen".
Zaintza eskaintza bere horretan
Zizurkilgo Udalak udaleku irekirik ez egitea erabaki zuen. Horren ordez, beharrean ziren familientzat zaintza eskaintza egin zen talde txikietara murriztuz. Zaintza eskaintza horrek orain arte bezala jarraituko duela jakinarazi dute, segurtasunez.