Segurtasun neurriak errespetatzeko gomendioa eman du, beti ere, Zizurkilgo Udalak: jende-pilaketak saihestea, 2 metroko distantzia uztea, eta, ezinezkoa den kasuetan, 6 urtetik gorakoek musukoak erabiltzea. Oharrak ipini ditu gune horietan, jendeak egoera honetan bete behar dituen neurriak kontuan izan ditzan.
Aire librean, orain arte bezala, plaza inguruen eta jende gehien ibili ohi den guneen desinfekzio lanekin jarraitu du Zizurkilgo Udalak, eta astelehen goizetan itxi egingo dira aipatutako kirol eremuak eta haur parkeak. Egun horretan goitik beherako garbiketa egingo zaie. «Lehen ere esan izan dugun moduan, COVID- 19aren pandemiari ahal den ondoen erantzutea da aurtengo gure helburu nagusia, eta horretarako garbiketa funtsezkoa da» azaldu du Iker Urruzola alkateak.
HIRU MAKINA BERRI
Horrez gain, udalak desinfekziorako hiru makina erosi ditu espazio itxietan erabiltzeko. Konfinamendua arintzeko hirugarren fasean sartuta, eta jendearen joan-etorria areagotu denez, garbiketa eta desinfekzioa areagotu egingo ditu udalak. Egunero desinfektatuko ditu liburutegia, udaletxea, udal bulegoak eta udaltzainen bulegoa. Beste eraikinak erabiltzen hasi ahala, horien garbiketa ere areagotu egingo dute.