Zizurkilgo festa batzordeak egoera aztertu ostean, Txapel Egunaren 27. edizioa datorren urtean, eta ahal bada, ohiko datetan egitea erabaki du. "Alex Inza zen aurtengo omendua eta datorren urtean jasoko du txapela eta merezi duen aitortza", aipatu dute festa batzordetik.
Txapel Eguneko omenduak Amabirjin jaiei hasiera emateko ohorea ere izaten du eta aurtengo festak ere kolokan daudenez, Txapel Eguna ospatzeko datorren urtera arte itxarotea dela onena erabaki du batzordeak. Festen inguruan datozen asteetan jakinaraziko dute erabakia herriko bi festa batzordeek.
Txartelen itzulera
Txapel Eguneko afarirako txartela erosia zutenek, erositako leku berean (Iriarten edo Egarrin) dirua bueltan jasotzeko aukera izango dute txartela itzultzearen truke. Festa batzordeak eskerrak eman nahi dizkie bi tabernei laguntzeko erakutsitako borondateagatik.