Zizurkilgo etxe batean 166 kalamu landare aurkitu ditu Ertzaintzak, "bikote arteko liskar batengatik" joan ondoren

Barne Sailak gertaerak joan den ostegunean kokatu ditu, maiatzaren 21ean. Bikotea atxiloturik eman zuten, ustezko osasunaren aurkako delituagatik. Diligentziak amaitzean aske geratu dira 43 urteko gizonezkoa eta 39 urteko emakumezkoa.

Joan den ostegun gauean "alerta dei bat" jaso zuten Ertzaintzan. Zizurkilgo etxebizitza batera gerturatu ziren, bikote arteko liskar bat zelakoan. Etxebizitzako emakumea identifikatzen hasi zirenean, etxebizitza barruan kolpeak eta gizonezko baten oihuak entzun omen zituzten: "Bere onetik aterata zegoen, eta etxeko hormen eta inmobiliarioaren aurka ari zen kolpeka".
 
Ertzainek, bi pertsonen artean eraso fisikorik ez zela izan baieztatu omen zuten. Aldiz, etxeko gela batzuk kalamua landatzeko egokituta zeudela jabetu ziren. Ondorioz, bi pertsonak atxilo eraman zituzten.
 
"Ondoren, baimenarekin berriro etxera itzuli eta erregistroa egin zuten". Ondorengoa aurkitu zutela azaldu dute Ertzaintzatik: 166 kalamu landare, ia bi kilo eta erdi kukulu, plastiko boltsa batzuk termo zigilatuta, kalamu eskejeak, kukuluekin adarrak, ziligatzeko makina eta liburuxka bat, apuntekeekin. Barne Sailetik jakinarazi dutenez, ostegunean atxilotutako bi pertsonak aske geratu dira, behin diligentziak amaituta.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!