Horrez gain, ohar hori baliatu nahi izan du umeei eskerrak ere emateko, etxetik atera ezinik egon diren tarte horretan guztian egindako esfortzuagatik. Udalak adierazi du jakitun dela zenbateko ahalegina egin behar izan duten haur zein gaztetxoek, erabateko konfinamenduan egon behar izan dutelako itxialdiaren hasieratik bertatik, inolako baimenik izan gabe kalera atera ahal izateko.
"Apirilaren 26tik aurrera, gauzak apur bat aldatuko dira, eta aldaketa handiago baten hasiera baino ez dela izango dirudi, gauzak onbidean doazela", adierazi du Zizurkilgo Udalak. "Itxialdia hasi zenetik egoera-aldaketetara egokitzen jakin izan duten bezala, apirilaren 26tik aurrerako irteera mugatura ere ederki moldatuko direla seguru gaude, eta, horregatik, animoak eman nahi dizkiegu udaletik".
