Etxealditik Euskaraldira

Kultura eta Euskara batzordeak bat egin du 'Etxealditik Euskaraldira' ekimenarekin

Apirilaren 20tik maiatzaren 3ra bitartean, Etxealditik Euskaraldira! izeneko ekimena jarriko da abian, Euskal Herri osoan. Zizurkilgo Kultura eta Euskara batzordeak ere bat egin du ekimen horrekin, eta parte hartzera animatu nahi izan dituzte herritar guztiak.

Bizi dugun egoera, etxealdi egoera, Euskaraldirako entrenamendu gisa baliatzea da proposamenaren asmo nagusia, eta hortik dator proposamenaren leloa ere: Etxealditik Euskaraldira!.

Ekimenak hainbat fase izango ditu: alde batetik, apirilaren 20a, ekimena aurkezteko erabili dute, helburuen berri emateko eta ekimenaren nondik norakoak aurkezteko; ondoren, apirilaren 21etik 23ra bitartean, etxeko hizkuntza-ohiturez hausnartzera gonbidatuko dituzte herritarrak; eta, jarraian, proposamen-fasea etorriko da, hizkuntza-ohiturak aldatzeko edo egokiak diren ohiturak finkatzeko proposamenak egingo zaizkie, apirilaren 24tik 30era bitartean, egun bakoitzeko proposamen bat. Azkenik, ekimena maiatzaren 3an amaituko da, ekimenari borobiltasuna emateko ekintza baten bidez.

"Etxealdia, beraz, beroketa ariketak egiteko eta jokaldiak entseatzeko baliatuko dugu, entrenamenduetan egiten den bezalaxe. Gero, azaroaren 20tik abenduaren 4ra jokatuko dugun partidara sasoi betean heltzeko, eta partida hori konfiantzaz eta segurtasun handiagorekin jokatu ahal izateko", adierazi dute Zizurkilgo Kultura eta Euskara batzordetik.

"Etxealdian prestatu eta Euskaraldian jokatu". Topaguneko lehendakari Kike Amonarrizek eta Rita Aldabaldetrekuk egindako aurkezpen-bideo honetan ekimenaren nondik norakoei buruzko informazio gehiago:

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!